கள்ள காதலர்களை சேர்த்து வைத்த தொப்பூர் காவல்துறை என தவறான தகவல் - தருமபுரி காவல்துறை கடும் எச்சரிக்கை

 

தருமபுரி பிப்ரவரி-12 

தருமபுரி மாவட்டம், தொப்பூர் காவல் நிலைய எல்லைக்குட்பட்ட கரியனூரைச் சேர்ந்த சௌந்தரராஜன் என்பவர், தனது மகள் சித்ரா காணவில்லை என்று தொப்பூர் காவல் நிலையத்தில் அளித்த புகாரின் பேரில் CSR:118/2026 பதிவு செய்து விசாரணை மேற்கொள்ளப்பட்டது. விசாரணையின் போது சித்ராவை கண்டுபிடித்து காவல் நிலையத்திற்கு அழைத்து வந்து குடும்பத்தாருடன் பேச்சுவார்த்தை நடத்தப்பட்டது.

​அப்போது சித்ரா தன் கணவருடனோ, பெற்றோருடனோ செல்ல விருப்பமில்லை என்றும், தனியாக வாழ விருப்பம் உள்ளதாக தெரிவித்ததால், அவரை சட்டரீதியாக வற்புறுத்த இயலாத காரணத்தால் அறிவுரை வழங்கி அனுப்பி வைக்கப்பட்டது.

​இதனால் ஆதங்கம் அடைந்த சித்ராவின் உறவினர்கள் மாதையன், சுரேஷ்குமார் மற்றும் ராஜசேகரன் ஆகியோர் காவல்துறையினரை பணி செய்ய விடாமல் ஆபாச வார்த்தைகளால் திட்டி, கொலை மிரட்டல் விடுத்து சென்றுள்ளனர். அதன் பேரில் தொப்பூர் காவல் நிலைய குற்ற எண்: 35/2026-படி மூன்று பிரிவின் கீழ் வழக்கு பதிவு செய்யப்பட்டு, தலைமறைவாக உள்ள எதிரிகளை தேடி வருகின்றனர். இவ்வழக்கு தொடர்ந்து விசாரணையில் இருந்து வரும் நிலையில் உண்மைக்கு புறம்பான தவறான செய்தியை ஒளிபரப்ப வேண்டாம் என கேட்டுக் கொள்ளப்படுகிறது.

 - காவல் கண்காணிப்பாளர் / தருமபுரி மாவட்டம்.